學識撒嬌 最殺食

不懂撒嬌的女人今個星期就大結局啦，咁快結局真係好唔捨得, 好想每晚睇Mall姐鬧人﹑比Saving同Cherry曬到盲啊！其實想要延續套劇都唔係咁難嘅，Cherry同Saving開頭就已經去過台南，分開後又喺台南相遇，台南可以話係佢地故事嘅開始，去佢地去過嘅地方旅行一定令你好似置身喺劇中！

第1站 台南善化胡厝寮外婆的彩繪牆

胡厝寮哩條村好純樸，住嘅大多數係老人家，而彩繪村嘅出現就係因為一個孫女唔捨得婆婆一個人住喺老家而起。孫女決定既然婆婆唔想搬去市區，咁孫女就將卡通人物同彩繪帶入村陪婆婆！孫女除左有諗頭仲有手藝添!下面嘅龍貓牆就係孫女畫嫁啦，婆婆企喺牆前影相好萌啊！

婆婆喺孫女畫作前留影

來源：阿春仔放送台

仲有3D感嘅大象

來源：胡厝寮彩繪村Facebook

第2站 阿裕溫體現宰牛肉涮涮鍋

Cherry搭飛機去台灣嘅時候就已經有人推介佢食溫體牛，而我地行程推介大家嘅哩間阿裕溫體現宰牛肉涮涮鍋就勁受台灣本地人歡迎，上佢地Facebook睇評語一律大讚湯頭鮮甜，肉質新鮮嫩滑，仲有唔同部位可以揀，連內臟都有供應添啊！

牛肉脂肪分佈平均，切得好薄身！

來源：愛小莎＠生活五四三

愛辣之人不妨挑戰下, 亦都有其他醬料可以揀

來源：愛小莎＠生活五四三

第3站 安平老街

安平老街係台南著名景點，入面食肆林立，除左有台南古早味小食仲有特色Cafe。我就覺得方蘭川焦皮布丁同阿美螃蟹粥應該會唔錯啦！

來源：Mimi韓の愛旅生活

第4站 海安路藝術街X神農街懷舊老屋街道

海安路係台南最熱鬧嘅行人區，入面有舊街景同建築，兩旁仲有地道小食﹑燒烤攤﹑PUB同其他商店。我相信你地去到一定會瘋狂影相，因為古舊嘅街景同建築實在太有味道，再加上牆上仲有好多圖案同畫，一定忍唔到手狂影相！！

第5站 林百貨

林百貨可以話係台灣碩果僅存嘅老百貨，建築相當復古。林百貨當時起得並唔係太大，有五層高，每次只會比400人入場，所以一到假期就會大排長龍。館內分左好幾區賣唔同嘅產品，我就覺得勁有台灣感覺嘅小擺設完全擄獲左我個心，你地睇下幾靚！！

來源：Via's旅行札記-旅遊美食部落格

睇完介紹係咪好想去呢？！５﹑６月都係好適合去台灣嘅月份，唔太熱又無咁易撞上落雨打風，如果你都打算去台南玩不妨參考下以上行程啊！！